భీష్ముడు చెప్తున్నాడు - అప్పుడు ఆ జన్మలో కూడా తపస్సు చేయాలనే దృఢనిశ్చయం కల ఆమెను చూచి తపస్వి జనులందరూ ఆమెను వారించారు. "నీవు ఏం చేయాలనుకుంటున్నావు" అని అడిగారు. (1)

అంతట ఆ కన్య తపోవృద్ధులైన ఆ ఋషులతో అప్పుడిలా అంది. "భీష్ముని చేత తిరస్కరించబడి, పతిధర్మం నుండి తొలగింపబడ్డాను(పతి లేనిదాననయ్యాను). (2)

తపోధనులారా! అతనిని వధించడానికే ఈ దీక్ష గాని లోకం కోసం కాదు. భీష్ముడిని చంపితేనే శాంతి కలుగుతుంది అని నా నిశ్చయం. (3)

తపస్వులారా! ఎవరి కారణంగా నేను శాశ్వతంగా ఇలాంటి కష్టస్థితిని పొందానో, పతిలోకం లేనిదానవై అటు స్త్రీని కాకుండా, పురుషుడినీ కాకుండా అయ్యానో ఆ భీష్ముడిని యుద్ధంలో చంపకుండా వెనక్కి తిరగను. ఇది నా హృదయంలో పుట్టిన సంకల్పం. అదే మీకు నేను చెప్పాను. (4,5)

స్త్రీత్వంపై విరక్తి కలిగింది. పుంస్త్వం పొందాలని కృత నిశ్చయంతో ఉన్నాను. భీష్మునిపై పగ తీర్చుకుంటాను. మీరు నన్ను వారించలేరు. (6)

ఆ మహర్షులమధ్యనుండి శూలపాణి, ఉమాపతి అయిన శంకరుడు స్వస్వరూపంతో తపస్వి అయిన ఆమెకు ప్రత్యక్షం అయ్యాడు. (7)

వరం కోరుకోమని అడిగిన పిమ్మట ఆమె నా పరాజయాన్ని కోరుకొంది. శంకరుడు ఆ మనస్వినితో "భీష్ముని చంపగలవు" అని పలికాడు. (8)

అప్పుడామె తిరిగి రుద్రుని ఇలా అడిగింది. "దేవా! స్త్రీనైన నాకు యుద్ధంలో జయం ఎలా సమకూడుతుంది. (9)

ఉమాపతీ! భూతేశా! స్త్రీభావంతో నా మనసు, గాఢమైన శాంతత్వాన్ని పొంది ఉంది. నీవు భీష్మ పరాజయాన్ని వాగ్దానం చేశావు. (10)

వృషధ్వజా! ఈ వరం నిజం అయ్యేలా చెయ్యి. శంతనుని కుమారుడైన భీష్ముడిని యుద్ధంలో ఎదుర్కొని చంపగలిగేలా చెయ్యి. (11)

వృషధ్వజుడైన మహాదేవుడు ఆ కన్యతో ఇలా అన్నాడు. నా మాట ఎప్పుడూ పొల్లుపోదు. నిజంగానే జరుగుతుంది. (12)

యుద్ధంలో భీష్ముని చంపుతావు. అందుకోసం పురుషత్వాన్ని కూడా పొందుతావు. దేహాంతరం పొందినప్పటికీ(మరుచటి జన్మలో కూడా) జరిగినదంతా స్మరించగలుగుతావు. (13)

ద్రుపదుని వంశంలో పుట్టి మహారథుడవు అవుతావు. శీఘ్రంగా అస్త్రాలు ప్రయోగిస్తూ అందరి మెప్పు పొంది చిత్రమైన యుద్ధం చేసేవాడవు అవుతావు. (14)

కల్యాణీ! అంతా చెప్పినట్లుగానే జరుగుతుంది. (ముందు కన్యగానే పుట్టినా) తరువాత కొంతకాలం గడిచాక పురుషుడవు అవుతావు. (15)

జటాజూటధారి వృషధ్వజుడు అయిన ఆ మహా దేవుడు ఇలా చెప్పి, ఆ విప్రులందరూ చూస్తుండగానే అక్కడే అంతర్థానమయ్యాడు. (16)

మహారాజా! అనిందితురాలయిన ఆ అంబ ఆ మహర్షులు అందరూ చూస్తూండగా ఆ వనం నుండి కట్టెలు తీసికొనివచ్చి గొప్ప చితిని పేర్చి అగ్నిని రగుల్కొల్పింది. యమునాద్వీపంలో ప్రజ్వరిల్లుతున్న ఆ అగ్నిలో రోషపూరితమైన మనస్సుతో ఆ కాశీరాజు పెద్దకూతురు "భీష్మవధకోసం" అని అంటూ అగ్నిప్రవేశం చేసింది. (17-19)

శ్రీమహాభారతమున ఉద్యోగపర్వమున అంబోపాఖ్యాన పర్వమను ఉపపర్వమున అంబ అగ్నిప్రవేశము అను నూట ఎనుబది ఏడవ అధ్యాయము. (187)