సంజయుడు పలికాడు. కురుశ్రేష్ఠా! నీవు నన్ను అడిగినట్లుగా అక్కడంతా అలాగే ఉన్నారు. కౌరవులూ, జనులూ కూడ కుశలంగా ఉన్నారు. అభిమానవంతులైన కురుశ్రేష్ఠులంతా నీవడిగినట్లుగా కుశలంగా ఉన్నారు. (1)

దుర్యోధనుని దగ్గర సత్పురుషులైన వృద్ధులూ ఉన్నారు. పాపాత్ములైన వారూ ఉన్నారు. దుర్యోధనుడు శత్రువులకైనా దానం చేస్తాడు. ఇక బ్రాహ్మణుల మాన్యాలను ఎలా హరిస్తాడు. (2)

దుర్యోధనుడు పట్ల ఎప్పుడూ ద్రోహం చెయ్యని మీ పట్ల ధృతరాష్ట్రుడు ద్రోహచింతన చేస్తే అది వానికే మంచిది కాదు. మీవంటి మంచినడవడిక కలవారిని ద్వేషిస్తే ధృతరాష్ట్రుడు మిత్రద్రోహి, చెడ్డవాడు కాగలడు. (3)

అజాతశత్రూ! ధృతరాష్ట్రుడు తనకొడుకుల్ని మీ పట్ల ద్రోహం చెయ్యడానికి అనుమతించటంలేదు. పైగా మీపట్ల వారి ద్రోహచింతనకు మనస్సులో మిక్కిలి బాధ పడుతున్నాడు. మిత్రద్రోహం అన్ని పాతకాలకంటే పెద్దది అని చెపుతున్న బ్రాహ్మణుల మాటలను శ్రద్ధగా వింటున్నాడు. (4)

రాజా! కౌరవులు యుద్ధ ప్రసంగంలో మీ గురించి, వీరాగ్రేసరుడైన అర్జునుని గురించి స్మరిస్తున్నారు. యుద్ధ సమయంలోని దుందుభి, శంఖధ్వనులు వినబడుతూ ఉన్నపుడు గదాపాణి భీమసేనుడు గుర్తుకు వస్తాడు. (5)

శత్రువులు దండెత్తినపుడు మహారథులు, చలింప శక్యంకాని వారూ ఎడతెగకుంఢా బాణవర్షం కురిపిస్తూ అన్ని దిక్కులకూ సంచరిస్తూ ఉండేవారు. వారిని కౌరవులు స్మరిస్తున్నారు. (6)

అజాతశత్రూ! అన్నిధర్మాలూ తెలిసిన నీవు కూడా ఇంతటి కఠినమైన కష్టాన్ని పొందావంటే, మానవునికి భవిష్యత్తులో జరుగబోయేది ఏమీ తెలియదనుకొంటున్నాను. పాండునందనా! ఇంతటి కష్టంలో ఉన్నప్పటికీ నీవే నీ ప్రతిభతో శాంతికి ఉపాయాన్ని ఆలోచించాలి. (7)

అజాతశత్రూ! ఇంద్రునితో సమానమైన పాండవులు తమ కోరికలకోసం ధర్మాన్ని ఎన్నడూ విడిచిపెట్టరు. కౌరవులు, పాండవులు, సృంజయులు ఇంకా ఇక్కడ ఉన్న రాజన్యులు అంతా క్షేమంగా ఉండే విధంగా నీ ప్రతిభతో నీవే ఈ సమస్యను పరిష్కరించాలి. (8 1/2)

అజాతశత్రూ! నీ తండ్రి ధృతరాష్ట్రుడు రాత్రి నాతో చెప్పిన ఈ మాటలను నీవు నీ మంత్రులకు, సోదరులకు, పుత్రులకు తెలియజెప్పు. (9,10)

ఇది శ్రీమహాభారతమున ఉద్యోగపర్వమున సంజయ యానపర్వమను ఉపపర్వమున సంజయవాక్యమను ఇరువది నాల్గవ అధ్యాయము. (24)