నారదుడిలా అన్నాడు.

యుధిష్ఠిరా! ఇప్పుడు సూర్యసుతుడైన యముని సభను గూర్చి చెపుతాను. విను. కౌంతేయా! దీనిని కూడా విశ్వకర్మయే నిర్మించాడు. (1)

రాజా! తేజోవంతమయిన ఆ సభ నూరు యోజనాల పొడవు వెడల్పులు గలది. పాండునందనా! అంతకన్న ఎక్కువైనా ఉండవచ్చు. (2)

ఈ యమసభ సూర్యతేజస్సు గలది. కోరిన రూపాన్ని ధరించగల దిది. అంతటా ప్రకాశవంతమైనది. శీతోష్ణాలను నియంత్రించగలది. మనోరంజకమయినది. (3)

ఆ సభలో శోకానికీ, శైథిల్యానికీ అవకాశం లేదు. ఆకలి దప్పులుండవు. అప్రియాలు జరుగవు. దీనత్వం కానీ, అలసట కానీ, ప్రాతికూల్యం కానీ అక్కడ ఉండవు. (4)

అరిందమా! దివ్యమానుషకాంక్షలన్నీ అక్కడ తీరుతాయి. రుచికరాలయిన భక్ష్యభోజ్యాలు అక్కడ మిక్కిలిగా ఉంటాయి. (5)

అక్కడ లేహ్య, చోష్య, పేయాలయిన ఆహారపదార్థాలు మనోహరాలు, రుచికరాలు అయి మనస్సుకు నచ్చుతాయి. ఆ సభలో పుణ్యపరిమళాలు గల పూలమాలలు, కోరిన పండ్ల నిచ్చే చెట్లు ఎప్పుడూ ఉంటాయి. (6)

ఆ సభలో తియ్యని చన్నీళ్ళు, వేణ్ణీళ్ళు ఎప్పుడూ దొరుకుతాయి. పవిత్రులయిన రాజర్షులు, నిర్మలులైన బ్రహ్మర్షులు పరమానందంతో అక్కడ సూర్యసుతుడైన యముని సేవిస్తారు. (7 1/2)

యయాతి, నహుషుడు, పూరుడు, మాంధాత, సోమకుడు, నృగువు, త్రసదస్యుడు, కృతవీర్యుడు, శ్రుతశ్రవుడు, అరిష్టనేమి, సిద్ధుడు, కృతవేగుడు, కృతి, నిమి, ప్రతర్దనుడు, శిబి, మత్స్యుడు, పృథులాక్షుడు, బృహద్రథుడు, వార్తుడు, మరుత్తుడు, కుశికుడు, సాంకాశ్యుడు, సాంకృతి, ధ్రువుడు, చతురశ్వుడు, సదశ్వోర్మి, కార్తవీర్యార్జునుడు, భరతుడు, సురథుడు, సునీథుడు, నిశఠుడు, నలుడు, దివోదాసుడు, సుమనుడు, అంబరీషుడు, భగీరథుడు, వ్యశ్వుడు, సదశ్వుడు, వధ్యశ్వుడు, పృథువేగుడు, పృథుశ్రవుడు, పృషదశ్వుడు, వసుమనుడు, క్షుపుడు, రుషద్రుడు, వృషసేనుడు, పురుకుత్సుడు, ఆర్ష్టిషేణుడు, దిలీపుడు, ఉశీనరుడు, ఔశీనరి, పుండరీకుడు, శర్యాతి, శరభుడు, శుచి, అంగుడు, అరిష్టుడు, వేనుడు, దుష్యంతుడు, సృంజయుడు, జయుడు, భాంగాసురి, సునీథుడు, నిషధేశ్వరుడు, వహీనరుడు, కరంధముడు, బాహ్లీకుడు, సుద్యుమ్నుడు, బలవంతుడైన మధువు, ఐలుడు, మరుత్తుడు, కపోతరోముడు, తృణకుడు, సహదేవుడు, అర్జునుడు, వ్యశ్వుడు, సాశ్వుడు, కృశాశ్వుడు, శశబిందుడు, దశరథుడు, కకుత్థ్సుడు, ప్రవర్ధనుడు, అలర్కుడు, కక్షసేనుడు, గయుడు, గౌరాశ్వుడు, పరశురాముడు, నాభాగుడు, సగరుడు, భూరిద్యుమ్నుడు, మహాశ్వుడు, పృథాశ్వుడు, జనకుడు, పృథువు, వారిసేనుడు, పురుజిత్తు, జనమేజయుడు, బ్రహ్మదత్తుడు, త్రిగర్తుడు, ఉపరిచరుడు, ఇంద్రద్యుమ్నుడు, భీమజానువు, గౌరపృష్ఠుడు, అనఘుడు, లయుడు, పద్ముడు, ముచుకుందుడు, భూరిద్యుమ్నుడు, ప్రసేనజిత్తు, అరిష్టనేమి, సుద్యుమ్నుడు, పృథులాశ్వుడు, అష్టకుడు, వందమంది మత్స్యరాజులు, నూర్గురు నీపరాజులు, వందమంది గయులు, వందమంది ధృతరాష్ట్రులు, వందమంది వీరులు, నూర్గురు ఈరులు, రెండువందలమంది భీష్ములు, వందమంది భీములు, వందమంది ప్రతివింధ్యులు, నూర్గురు నాగరాజులు, వందమంది హయరాజులు, వందమంది పలాశులు, నూర్గురు కాశీరాజులు, వందమంది కుశరాజులు, శాంతనువు, పాండురాజు, ఉశంగవుడు, శతరథుడు, దేవరాజు, జయద్రథుడు, వృషదర్భరాజర్షి, ఆయన మంత్రులూ, వేలకొలదిగ శశబిందురాజులు ఆ సభలో ఉంటారు. వారు అనేక మహా యాగాలను భూరిదక్షిణలతో నిర్వహించి ధర్మరాజలోకాన్ని పొందినవారు. రాజేంద్రా! పుణ్యాత్ములు, కీర్తిమంతులు, బహుశ్రుతులు అయిన ఈ రాజర్షులందరూ ఆ సభలో సూర్యసుతుడైన యముని సేవిస్తుంటారు. (8-28)

అగస్త్యుడు, మతంగుడు, కాలుడు, మృత్యువు, యజ్ఞకర్త, సిద్ధులు, యోగశరీరధారులు, అగ్నిష్వాత్తపితరులు, ఫేనపులు, ఊష్మపులు, స్వధావంతులు, బర్హిషదులు మొదలుగా గల పితరులు, కాలచక్రమూ, పూజ్యుడైన హవ్యవాహనుడు, దక్షిణాయనంలో మరణించిన మనుషులు, దుష్కరకర్మలు చేసిన మనుష్యులు, కాలుని ఆజ్ఞకు లోబడిన యమదూతలు, శింశప, పలాశ, కాశ, కుశాదులను అభిమానిమ్చే దేవతలు మూర్తిమంతులై ఈ సభలో ధర్మరాజును సేవిస్తారు. (29-32)

వీరే కాక మరెందరో పితృరాజైన యముని సభలో సభ్యులు. వారిపేర్లను, కర్మలను పరిగణించటం అసాధ్యమ్. (33)

కుంతీనందనా! ఆ యమసభ బాధారహితమైనది. అందమైనదీ, స్వేచ్ఛగా సంచరించునదీ. ఎంతోకాలం తపిమ్చి విశ్వకర్మ దానిని నిర్మించాడు. (34)

భారతా! ఆ సభ తన తేజస్సుతో ప్రజ్వలిస్తూ ప్రకాశిస్తూ ఉంటుంది. ఉగ్రతపస్వులు, సత్యవాదులు, సువ్రతులు, శాంతులు, సన్యాసులు, పరిశుద్ధులు, పుణ్యకర్మలవలన పవిత్రులు అక్కడ ప్రవేశించగలరు. వారంతా తేజోవంతమైన శరీరం, నిర్మలవస్త్రాలు ధరించి ఉంటారు. (35,36)

వారు అందరూ చిత్రమైన భుజాలంకారాలూ, చిత్రమైన హారాలూ, ప్రకాశిమ్చే కుండలాలు ధరించి ఉంటారు. తమ తమ పుణ్యకర్మలు, వస్త్రాభరణాలు వారికి విభూషణాలు. (37)

మహాత్ములయిన గంధర్వులు, గుంపులు గుంపులుగా అచ్చరలు ఆ సభలో నుండి సర్వవిధాలయిన వాద్యాలతో, నృత్యగీతాలతో, హాస్యలాస్యాలతో ఆనందింపజేస్తారు. (38)

కౌంతేయా! ఆ సభలో నిత్యమూ అన్నివైపులా దివ్యపరిమళాలు, పవిత్రశబ్దాలు, దివ్యమాలలూ సన్నిహితాలై ఉంటాయి. (39)

సుందరరూపధారులయిన కోటిమంది ధర్మాత్ములూ, మానధనులు మహనీయుడయిన యముని ఉపాసిస్తుంటారు. (40)

రాజా! పరేతరాజు, మహానుభావుడూ అయిన యముని సభ ఇటువంటిది. ఇక పుష్కరాదితీర్థాలతో ప్రకాశించే వరుణసభను గురించి చెపుతాను. (41)

ఇది శ్రీమహాభారతమున సభాపర్వమున లోకపాల సభాఖ్యానపర్వమను ఉపపర్వమున యమసభావర్ణనమను ఎనిమిదవ అధ్యాయము. (8)