నారదుడు ఇలా అన్నాడు.

"కురునందనా! ఇంద్రుని యొక్క తేజోవంతమైన దివ్యసభ సూర్యతేజంతో సమానంగా ప్రకాశిస్తున్నది. విశ్వకర్మయొక్క ప్రయత్నంతో ఆ సభ నిర్మింపబడింది. (1)

ఆసభ నూరుయోజనాల వెడల్పు, నూట ఏభైయోజనాల పొడవు, ఐదు యోజనాల ఎత్తు కలిగి ఆకాశంలో సంచరిస్తుంది. అది కామగమనశక్తి కలది. (2)

ఆ సభలో ముసలితనంతో బాధపడేవారు, శోకంతో కష్టాలతో బాధపడేవారూ ఉండరు. అక్కడ భయం అనేది లేదు. అది మంగళకరం. శోభాసంపన్నమూను. అక్కడ ఉండటానికి అతి సుందరమైన మహళ్లున్నాయి. కూర్చుండటానికి ఉత్తమోత్తమసింహాసనాలు ఉన్నాయి. ఆ సభ దివ్యవృక్షాలతో శోభాయమానంగా ఉంది. (3)

ఆ సభలో దేవేంద్రుడు తన పట్టమహిషి అయిన శచీదేవితో కూడి సకలైశ్వర్యాలతో సింహాసనస్థుడై ఉంటాడు. ఆ శచీదేవి లక్ష్మివంటి శోభతో విరాజిల్లుతుంది. (4)

ఆ సమయంలో దేవేంద్రుడు కిరీటాన్ని, ఎర్రటి అంగదాలను ధరించి మటలకందని రూపంతో వెలుగుతుంటాడు. నిర్మల వస్త్రాలతో, విచిత్రమాలలతో ప్రకాశిస్తాడు. లజ్జ, కీర్తి, కాంతులతో నిండి ఉంటాడు. (5)

రాజా! మహనీయుడయిన ఆ దేవేంద్రుని చుట్టూ నిలిచి మరుద్గణాలు, గృహస్థులయిన దేవతలు నిత్యమూ సేవిస్తూ ఉంటారు. (6)

సిద్ధులు, దేవమునులు, సాధ్యులు, దేవతాగణాలు, మరుత్వంతులు - వీరంతా సువర్ణమాలలను అలంకరించుకొని ఒక్కటై నిలిచి మహాత్ముడయిన ఆ దేవేంద్రుని ఈ సభలోనే సేవిస్తారు. వారంతా తమతమ అనుచరులతో కలిసి దివ్య-రూపాలను ధరించి చక్కగా అలంకరించుకొని ఉంటారు. (7,8)

కౌంతేయా! ఈ రీతిగా పాపరహితులై నిర్మలులై ప్రజ్వలిమ్చే అగ్నిలాగా దేవర్షులందరూ దేవేంద్రుని సేవిస్తారు. (9)

ఆ దేవర్షులు తేజోవంతులు, సోమయాగకర్తలు, చింతాశోకాలు లేనివారు. (9 1/2)

పరాశరుడు, పర్వతుడు, సావర్ణి, గాలవుడు, శంఖుడు, లిఖితుడు, గౌరశిరుడు, దుర్వాసుడు, క్రోధనుడు, శ్యేనుడు, దీర్ఘతముడు, పవిత్రపాణి, సావర్ణి (ద్వితీయ) యాజ్ఞవల్కుడు, భాలుకి, ఉద్దాలకుడు, శ్వేతకేతువు, తాండ్యుడు, భాండాయని, హవిష్మంతుడు, గరిష్ఠుడు, హరిశ్చంద్రమహారాజు, హృద్యుడు, ఉదరశాండిల్యుడు, విశాఖుడు, విధాత, కాలుడు, కరాలదంతుడు, త్వష్ట, విశ్వకర్మ, తుంబురుడు - మొదలయిన ఎందరో మునులు, వాయుభక్షకులూ,హవిర్భోక్తలు అయిన మహర్షులు సర్వలోకాధిపతి అయిన వజ్రపాణిని సేవిస్తారు. (10-15)

పాండుకుమారా! సహదేవుడు, సునీథుడు, మహాతపస్వి అయిన వాల్మీకి, సత్యవాది అయిన శమీకుడు, సత్యప్రతిజ్ఞుడైన ప్రచేతుడు, మేధాతిథి, వామదేవుడు, పులస్త్యుడు, వులహుడు, క్రతువు, మరుత్తుడు, మరీచి, మహాతపస్వి అయిన స్థాణువు, కక్షీవంతుడు, గౌతముడు, తార్ష్యుడు, వైశ్వానరముని, షడర్తుడు, కవషుడు, ధూమ్రుడు, రైభ్యుడు, వలుడు, పరావసుడు, స్వస్త్యాత్రేయుడు, జరత్కారువు, కహాలుడు, కాశ్యపుడు, విభాండకుడు, ఋష్యశృంగుడు, ఉన్ముఖుడు, విముఖుడు, కాలక వృక్షీయుడు, ఆశ్రావ్యుడు, హిరణ్మయుడు, సంవర్తుడు, దేవహవ్యుడు, విష్వక్సేనుడు, కణ్వుడు, కాత్యాయనుడు, గార్గ్యుడు, కౌశికుడు, ఆ సభలో ఉంటారు. దివ్యజలాలు, ఓషధులు, శ్రద్ధ, మేధ, సరస్వతి, అర్థధర్మకామాలు, విద్యుత్తు, మేఘాలు, వాయువు, గర్జించే మబ్బులు, తూర్పుదిక్కు, హవిర్వాహకులయిన సప్తవింశతి వహ్నులు, అగ్నీషోములు, ఇంద్రాగ్నులు, మిత్రుడు, సవిత, అర్యముడు, భగుడు, విశ్వేదేవులు, సాధ్యులు, బృహస్పతి, శుక్రుడు, విశ్వావసువు, చిత్రసేనుడు, సుమనుడు, తరుణుడు, యజ్ఞాలు, దక్షిణలు, గ్రహాలు, తారలు, యజ్ఞనిర్వాహక మంత్రాలు - ఇంద్రసభలో అలంకారాలు. (16-23)

రాజా! అదేవిధంగా అందమయిన అప్సరసలు, మనోహరులయిన గంధర్వులు నృత్య, గీత, వాద్యాలతో

వివిధ హాస్యవిన్యాసాలతో దేవరాజయిన ఇంద్రుని మనస్సును రంజింపజేస్తారు. (24)

అంతేకాక స్తుతులతో, మంగళగీతాలతో, వీరగాథలతో బలుని, వృత్రుని సంహరించిన దేవేంద్రుని స్తుతిస్తూ ఉంటారు. (25)

మరెందరో బ్రహ్మర్షులు, రాజర్షులు, దేవర్షులు పూలమాలలు ధరించి, వస్త్రాభరణాల నలంకరించుకొని, అగ్నుల వలె ప్రకాశిస్తూ దివ్య విమానాలలో దేవేంద్రుని సన్నిధికి వస్తూ పోతూ ఉంటారు. (26,27)

రాజా! బృహస్పతి, శుక్రుడు ఎప్పుడూ అక్కడే ఉంటారు. వీరూ మరెందరో మహాత్ములు, సంయములు, చంద్రునివలె దర్శనీయులై చంద్రునివలె ప్రకాశిమ్చే విమానాలలో అక్కడకు వస్తారు. బ్రహ్మసమానులైన భృగువు, సప్తర్షులు కూడా అక్కడ ప్రకాశిస్తుంటారు. (28,29)

రాజా! కమలశోభితమయిన ఈ ఇంద్రసభను నేను చూశాను. మహాబాహూ! ఇక యమసభను గురించి విను. (30)

ఇది శ్రీమహాభారతమున సభాపర్వమున లోకపాల సభాఖ్యానపర్వమను ఉపపర్వమున ఇంద్రసభావర్ణనమను ఏడవ అధ్యాయము. (7)

(దాక్షిణాత్య అధికపాఠం 2 శ్లోకాలు కలిపి మొత్తం 32 శ్లోకాలు)