వైశంపాయనుడు అన్నాడు - జనమేజయమహారాజా! పాండవులతో సంబంధం కలిగిన ద్రుపదునికి దేవతల వల్ల కూడా భయం లేదు. ఇక మనుష్యుల విషయం చెప్పనవసరం లేదు. (1)

ద్రుపదుడు పంపిన దాసీజనం కుంతి పేరును కీర్తిస్తూ కుంతికి సాష్టాంగ ప్రణామం చేశారు. (2)

ద్రౌపది పట్టువస్త్రాలు ధరిమ్చి వివాహమంగళం పూర్తి కావించి, అత్తకు వంగి, దోసిలి ఘటించి, వినయంతో నమస్కరించింది. (3)

అందం, శుభలక్షణాలు, శీలాచారాలు గల కోడలు ద్రౌపదిని కుంతి ప్రేమతో ఆశీర్వదించి పలికింది. (4)

ద్రౌపదీ! ఇంద్రాణి ఇమ్ద్రుని, స్వాహాదేవి అగ్నిని, రోహిణి చంద్రుని, దమయంతి నలుని, బద్ర కుబేరుని, అరుంధతి వసిష్ఠుని, లక్షీదేవి నారాయణుని, సేవించినట్లు నీభర్తలను ప్రేమతో సేవించు. (5,6)

మంగళకరమైనదానా! నీవు సౌఖ్యాలతో కూడి చిరంజీవులు, వీరులూ అయిన కొడుకులను పొందు. సౌభాగ్య, భోగాలను పొంది యజ్ఞపత్నివి, పతివ్రతవు అగుము. (7)

ఇంటికి వచ్చిన అతిథులను, అభ్యాగతులను, వృద్ధులను, పెద్దలను తగినట్లు సేవిస్తూ అనేకవత్సరాలు గడిపెదవు గాక! (8)

ధర్మవత్సలవైన నీవు కురుజాంగలం మొదలయిన రాష్ట్రాలకు, నగరాలకు భర్తతో కలిసి అభిషిక్తురాలవై పట్టపురాణివి కాగలవు. (9)

మహాబలులైన నీభర్తలు పరాక్రమంతో భూమినంతటిని జయిస్తారు. అశ్వమేధయాగంలో ఆ భూమిని నీవు బ్రాహ్మణులకు ఇయ్యి. (10)

కల్యాణీ! గుణవంతురాలవైన నీవు భూమి మీది విలువైన రత్నాలన్నింటిని పొంది చిరకాలం సుఖాలు అనుభవించు! (11)

ద్రౌపదీ! పట్టువస్త్రాలు కట్టిన నిన్ను ఇపుడు అభినందిస్తున్నట్టే నీకు పుత్రులు కల్గినప్పుడు తిర్గి అబినందిస్తాను. (12)

వైశంపాయనుడు అన్నాడు - జనమేజయా! వివాహం చేసికొని వచ్చిన పాండవులకు కృష్ణుడు వైడూర్యాలు పొదిగిన ఆభరణాలు, విలువైన వస్త్రాలు, వివిధదేశీయాలైన కంబళీలు, లేడి చర్మాలు, రత్నాలు, తల్పాలు, వాహనాలు, వైడూర్యాలు పొదిగిన పాత్రలు పంపాడు. (13-15)

రూపయౌవనదాక్షిణ్యాలు గలిగి, చక్కగా అలంకరింపబడిన వేర్వేరు దేశాల దాసీజనాన్ని పాండవులకు శ్రీకృష్ణుడు ఇచ్చాడు. (16)

అప్రమేయుడైన హరి మాటవినే ఏనుగులు, అలంకరింపబడిన గుఱ్ఱాలు, దంతనిర్మితాలైన రథాలు, బంగారు నాణాలు, కోట్ల కొలది స్వర్ణరాశులను బారులు తీర్చి పంపాడు. (17,18)

ధర్మరాజైన యుధిష్ఠిరుడు మిక్కిలి సంతసించి శ్రీకృష్ణుని సంతోషం కోసం వాటినన్నింటిని స్వీకరించాడు. (19)

ఇది శ్రీమహాభారతమున ఆదిపర్వమున వైవాహికపర్వమను

ఉపపర్వమున నూటతొంబది ఎనిమిదవ అధ్యాయము. (198)