ద్రుపదుడు చెప్పాడు - మహర్షీ! మీ మాటలు వినక పూర్వం ద్రౌపదికి ఒకనితోనే వివాహం చేయాలని సంకల్పం. విధాత విధానాన్ని ఎదిరించగల శక్తి ఎవరికీలేదు. అయిదుగురితో వివాహమే ఉచితం. (1)

అదృష్టాన్ని ఎవ్వరూ తప్పించలేరు. స్వయంగా ప్రయాసపడి ఏమీ చేయలేరు. ఒకవరునికై చేసిన యత్నం అయిదుగురు వరులనిచ్చింది. కాబట్టి ముందు చేసిన నిర్ణయమే ఉచితం. (2)

పూజ్యుడా! ఫూర్వజన్మలో ద్రౌపది శంకరునితో చాలాసార్లు పతిని కోరగా అతడట్లే వరమిచ్చాడు. ఇందు దాగిన రహస్యం పరమాత్మకే తెలుసు. (3)

శంకరుని అనుశాసనమే అయితే ధర్మాధర్మప్రసక్తి, నా అపరాధమూ లేవు. ఈమె వీరిదే కావున విధివిధానంగా పాండవులు ఈమెను పరిగ్రహిస్తారు. (4)

వైశంపాయనుడు అన్నాడు - పిమ్మట భగవంతుడైన వ్యాసుడు ధర్మజునితో పలికాడు. ధర్మరాజా! నేడు ద్రౌపదిని వివాహమాడు. ఇంద్రుడు పుష్యమీనక్షత్రంతో కలుస్తాడు. కావున నీవు ముందుగా ద్రౌపదిని వివాహమాడు. (5)

వ్యాసాదేశానుసారం యజ్ఞసేనుడు పుత్రులతో కలిసి వధూవరులకవసరమైన ద్రవ్యాలను తెప్పించి స్నానాదులు చేయించి ద్రౌపదిని విలువైన రత్నమాణిక్యాలతో అలంకారం చేయించాడు. (6)

రాజు స్నేహితులు, మంత్రులు, బ్రాహ్మణులు, పౌరులు అందరు మిక్కిలి ప్రసన్నులై పెద్దలను ముందు ఉంచుకొని కూర్చున్నారు. (7)

ద్రుపదరాజభవనం ఉత్తమపురుషులతో ప్రకాశిస్తోంది. అతని భవనప్రాంగణం కలువలతో, పద్మాలతో వెలిగిపోతోంది. అక్కడ చతురంగసేనలు చిత్రంగా అమరి ఉన్నాయి. ఆరాజభవనం నిర్మల నక్షత్రాలతో వెలిగే ఆకాశం వలె ఉంది. (8)

అక్కడ యువకులు, అలంకృతులు, కుండలాలంకృతులు. స్నానాలు చేసి విలువైన పట్టుబట్టలు కట్టుకొని, చందనం పూసికొని, మంగళక్రియలు ఆచరిస్తూ పాండవులున్నారు. (9)

క్రమంగా ప్రసన్నతతో పాండవులు గోశాలలోనికి వృషభాలు చేరినట్లు అగ్నివలె వెలిగే తమపురోహితుడు ధౌమ్యునితో కలిసి శాస్త్రప్రకారంగా సదస్సులో ప్రవేశించారు. (10)

పిమ్మట వేదపారంగతుడు, విద్వాంసుడు, మంత్రజ్ఞుడు, పురోహితుడు అయిన ధౌమ్యుడు అగ్నిని వెలిగించి మంత్రాహుతుల నిచ్చి యుధిష్ఠిరుని పిలిచి ద్రౌపదికి సూత్రం కట్టించాడు. (11)

వేదనిధి అయిన ధౌమ్యుడు వారిద్దరిచే పాణిగ్రహణం చేయించి అగ్నికి ప్రదక్షిణం చేయించాడు. ధర్మజుని ఆజ్ఞపై పురోహితుడు రాజభవనం వదలినాడు. (12)

కౌరవకులోన్నతికై మహారథులైన నలువురు పాండవులూ క్రమంగా ఒక్కొక్కరోజున ఒక్కొక్కరు ద్రౌపదిపాణిగ్రహణం చేశారు. (13)

దేవర్షి అచటి అద్భుతమూ, ఉత్తమమూ, అతిమానుషమూ అయిన సంఘటనను తెలిపాడు. మహానుభావురాలు, సన్ననినడుముగల ద్రౌపది ప్రతిదినమూ వివాహానంతరం కన్యగానే ఉందట. (14)

వివాహానంతరం ద్రుపదుడు మహారథులైన పాండవులకు వివిధవస్తుసామగ్రిని, సువర్నమాలలు కల నూరు రథాలను కానుకలుగా ఇచ్చాడు. (15)

పద్మమూ, శంఖమూ గల నూరు ఉత్తమ గజాలను, బంగారు తొడిగిన కొమ్ములు గల వంద ఏనుగులను, యౌవనవతులైన వందమంది దాసీజనాన్ని, విలువైన వస్త్రాలను, ఆభరణాలనూ కానుక చేశాడు. (16)

చంద్రవంశజుడు, మహానుభావుడైన ద్రుపదుడు దివ్యమైన చూపులు గల పాండవులందరికి వేరువేరుగా అగ్నిసాక్షికంగా ధనాన్ని, వస్త్రాలనూ, అధికారసూచకాలయిన ఆభరణాలనూ అర్పించాడు. (17)

వివాహానతరం మహాబలశాలులూ, ఇంద్రసమానులూ అయిన పాండవులు అనంతరత్నరాశులతో పాటు లక్ష్మివంటి ద్రౌపదిని పొంది ఆ పాంచాలరాజునగరంలో విహరించసాగారు. (18)

రాజా! పాండవులందరూ ద్రౌపది ఏకాగ్రత, సచ్ఛీలం, సదాచారాలతో సంతుష్టులయ్యారు. ఈ విధంగా ద్రౌపది తన సద్ర్వతాలతో పాండవుల ఆనందాన్ని పెంచసాగింది.

ఇది శ్రీమహాభారతమున ఆదిపర్వమున వైవాహికపర్వమను

ఉపపర్వమున ద్రౌపదీవివాహమను నూటతొంబది ఏడవ అధ్యాయము. (197)

(దాక్షిణాత్య అధికపాఠం 1 శ్లోకంతో కలిపి 19 శ్లోకాలు)