నారదుడిలా అన్నాడు - ఇది పాములను ఆహారంగా స్వీకరించే గరుడపక్షుల లోకం, పరాక్రమించటంలో, ఎంత దూరమయినా ఎగరటంలో, ఎంత బరువైనా మోయటంలో వీటికి కొంచెంకూడా శ్రమ ఉండదు. (1)

మాతలీ! సుముఖుడు, సునాముడు, సునేత్రుడు, సువర్చస్కుడు, సురుచుడు, సుబలుడు అనే పేర్లుగల ఆరుగురు గరుత్మంతుని కుమారులు ఇక్కడ తమ వంశాలను విస్తరించి ఉన్నారు. వినతావంశవర్ధనులు, కశ్యపకుల సంజాతులు, సంపత్సంవర్ధకులు అయిన ఈ ఆరుగురు గరుడజాతిని వందలు, వేలు శాఖలుగా విస్తరింపజేసి ఉన్నారు. (2-4)

వీరందరూ, లక్ష్మీసంపన్నులు, శ్రీవత్సలాంఛనం గలవారు. ఐశ్వర్యాన్ని కోరుతూ ఎంతో బలాన్ని ధరించి ఉన్నవారు. (5)

బ్రాహ్మణవంశంలో పుట్టినవారైనా వీరు క్షత్రియకర్మను పాటించేవారు. వీరు దయాహీనులూ, సర్ప భక్షకులూ. ఈ విధంగా తమ దాయాదులయిన సర్పాలను నాశనంచేసినందువలన వీరికి బ్రాహ్మణత్వం లభించలేదు. (6)

మాతలీ! నేనిప్పుడు వీరిలో ప్రాధాన్యాన్ని అనుసరించి కొందరి పేర్లను చెప్తాను విను. విష్ణుమూర్తి పరివారంలో చేరి ఈ వంశం ప్రశంసనీయమయింది. (7)

వీరికి విష్ణువే దేవుడు, విష్ణువే పరమాశ్రయం. వీరి మనస్సులలో ఎప్పుడూ విష్ణువు ఉంటారు. వీరికి ఎల్లప్పుడూ విష్ణువే గతి. (8)

సువర్ణచూడుడు, నాగాశి, దారుణుడు, చండతుండకుడు, అనిలుడు, అనలుడు, విశాలాక్షుడు, కుండలి, పంకజిత్తు, వజ్రవిష్కంభుడు, వైనతేయుడు, వామనుడు, వాతవేగుడు, దిశాచక్షువు, నిమేషుడు, అనిమిషుడు, త్రిరావుడు, సప్తరావుడు, వాల్మీకి, ద్వీపకుడు, దైత్యద్వీపుడు, సరిద్ ద్వీపుడు, సారసుడు, పద్మకేతనుడు, సుముఖుడు, చిత్రకేతువు, చిత్రకేతువు, చిత్రబర్హుడు, అనఘుడు, మేషహృత్తు, కుముదుడు, దక్షుడు, సర్పాంతుడు, సహభోజనుడు, గురుభారుడు, కపోతుడు, సూర్యనేత్రుడు, చిరాంతకుడు, విష్ణుధర్ముడు, కుమారుడు, పరిబర్హుడు, హరి, సుస్వరుడు, మధుపర్కుడు, హేమవర్ణుడు, మాలయుడు, మాతరిశ్వుడు, నిశాకరుడు, దివాకరుడు - ఈ విధంగా సంక్షేపంగా నేను గరుడ సంతతిని వర్ణించాను. వీరంతా కీర్తిసంపన్నులూ, మహాబలులు. (9-15)

మాతలీ! వీరిలో ఎవ్వరూ నచ్చకపోతే రా, పోదాం. తప్పక ఎవరో ఒకరు నీకునచ్చే ప్రదేశానికి నిన్ను తీసికొనిపోతా.(16)

ఇది శ్రీమహాభారతమున ఉద్యోగ పర్వమున భగవద్యాన పర్వమను ఉపపర్వమున మాతలి వరాన్వేషణ మను నూటొకటవ అధ్యాయము. (101)