81. ఎనుబది ఒకటవ అధ్యాయము
సహదేవుడు, సాత్యకి యుద్ధమునకు ఇష్టపడుట - యోధులు సమర్థించుట.
సహదేవ ఉవాచ
యదేతత్ కథితం రాజ్ఞా ధర్మ ఏష సనాతనః।
యథా చ యుద్ధమేవ స్యాత్ తథా కార్యమరిందమ॥ 1
సహదేవుడు ఇలా అన్నాడు. అరిందమా! యుధిష్ఠిరమహారాజు చెప్పిన ఈ విషయమంతా సనాతనధర్మం. యుద్ధం జరిగేటట్లు నీవు ప్రయత్నించాలి. (1)
యది ప్రశమమిచ్ఛేయుః కురవః పాండవైః సహ।
తథాపి యుద్ధం దాశార్హ యోజయేథాః సహైవ తైః॥ 2
దాశార్హా! కౌరవులు పాండవులతో సంధికి కోరుకొన్నా, నీవు వారితో యుద్ధం జరిగేటట్లే యోజన చేయాలి. (2)
కథం ను దృష్ట్వా పాంచాలీం తథా కృష్ణ సభాగతామ్।
అవధేన ప్రశామ్యేత మమ మన్యుః సుయోధనే॥ 3
కృష్ణా! నాడు సభలో ఆ పరిస్థితిలో ఉన్న ద్రౌపదిని చూసి సుయోధనునిపై నాకు కలిగిన కోపం సుయోధనుని చంపకుండా ఎలా శాంతిస్తుంది? (3)
యది భీమార్జునౌ కృష్ణ ధర్మరాజశ్చ ధార్మికః।
ధర్మముత్సృజ్య తేనాహం యోద్ధుమిచ్ఛామి సంయుగే॥ 4
కృష్ణా! భీముడు, అర్జునుడు, ధర్మరాజు - ఈ ముగ్గురూ ఒకవేళ ధర్మమార్గాన్ని అనుసరించినా నేను మాత్రం ధర్మాన్ని వదిలి యుద్ధంలో పోరాడలనే కోరుకొంటున్నాను. (4)
సాత్యకి రువాచ
సత్యమాహ మహబాహో సహదేవో మహామతిః।
దుర్యోధనవధే శాంతిః తస్య కోపస్య మే భవేత్॥ 5
సాత్యకి ఇలా అన్నాడు.
మహాబాహూ! మేధావి అయిన సహదేవుడు చక్కగా చెప్పాడు. (సత్యం చెప్పాడు). ఆ నా కోపం శమించటానికి సుయోధనుని చంపటమొక్కటే ఉపాయం. (5)
న జానాసి యథా దృష్ట్వా చీరాజినధరాన్ వనే।
తవాపి మన్యురుద్భూతో దుఃఖితాన్ ప్రేక్ష్య పాండవాన్॥ 6
నీకు గుర్తుండే ఉంటుంది. అరణ్యంలో నార చీరలనూ, జింక చర్మాలనూ ధరించి తిరుగుతున్న పాండవులను చూచి నీకు కూడా కోపం వచ్చింది గదా! (6)
తస్మాన్మాద్రీసుతః శూరః యదాహ రణకర్కశః।
వచనం సర్వయోధానాం తన్మతం పురుషోత్తమ॥ 7
కాబట్టి పురుషోత్తమా! యుద్ధంలో కర్కశంగా ప్రవర్తించగల శూరుడైన సహదేవుని మాటయే యోధులందరి అభిప్రాయం. (7)
వైశంపాయన ఉవాచ
ఏవం వదతి వాక్యం తు యుయుధానే మహామతౌ।
సుభీమః సింహనాదోఽభూద్ యోధానాం తత్ర సర్వశః॥ 8
వైశంపాయనుడిలా అన్నాడు - మహామతి అయిన సాత్యకి ఈ విధంగా మాట్లాడగానే అక్కడున్న సమస్త సైనికులూ /యోధులూ భీకరంగా సింహనాదం చేయ నారంభించారు. (8)
సర్వే హి సర్వశో వీరాః తద్వచః ప్రత్యపూజయన్।
సాధు సాధ్వితి శైనేయం హర్షయంతో యుయుత్సవః॥ 9
యుద్ధం చేయాలన్న కోరికతో వచ్చి ఉన్న అక్కడి వీరులంతా 'భళా భళా' అంటూ ఆనందిస్తూ సాత్యకి వచనాలను సర్వాత్మనా ప్రశంసించారు. (9)
ఇతి శ్రీమహాభారతే ఉద్యోగపర్వణి భగవద్యాన పర్వణి సహదేవ సాత్యకివాక్యే ఏకాశీతితమోఽధ్యాయః॥ 81 ॥
ఇది శ్రీమహాభారతమున ఉద్యోగపర్వమున భగవద్యానపర్వమను ఉపపర్వమున సహదేవసాత్యకి వచనమను ఎనుబది యొకటవ అధ్యాయము. (81)