సం॥వి॥ ధృతరాష్ట్రుని కపట ద్యూతం అధర్మమే అయినా, ఆపత్కాలంలో ఆద్యూతమే ధర్మంగా అంగీకరింపబడింది. ధృతరాష్ట్రుడు మాకు వేరేరాజ్యం ఇవ్వడం ధర్మమే అయినా, లక్కైంటిని నివాసానికివ్వడం వల్ల అధర్మమే అవుతుంది. మేం ప్రతిజ్ఞ ప్రకారం వనవాసం చేయడం ధర్మం ధర్మరూపంతోనే కనపడడ మవుతుంది. జ్ఞాతి వధ అధర్మంగా తోచినా, అధార్మికులైన ధార్తరాష్ట్రులను వధించడం మాకు క్షాత్ర ధర్మమే అవుతోంది కాబట్టి దోషం లేదని ధర్మరాజు మాటల ఆంతర్యం. (అర్జు)

సం॥వి॥ మేము ఆపదలో ఉన్నాం కాబట్టి కౌరవుల వధ మాకు ధర్మమే అవుతుంది అని ధర్మజుని ఉద్దేశ్యం. (లక్షా)

సం॥వి॥ అందువల్ల ఆపదలో ఉన్నమేము జ్ఞాతివధరూపమైన కొంత అధర్మం చేసినా నిందింపదగినవారం కాదు అని ధర్మజుని అభిప్రాయం. (అర్జు)

సం.వి. నీవు చెప్పింది సంపద్ధర్మం. మేమిపుడు ధనశ్రీహరణం వల్ల ఆపదలో ఉన్నాం. మాధర్మం వేరే ఉంటుంది. జ్ఞాతివధరూపమైన అధర్మం చేసినా, అది ఆపద్ధర్మం కాబట్టి మాకు దోషం లేదు అని ధర్మజుని అభిప్రాయం. (అర్జు)

సం॥వి॥ విదితాత్ములైన రాజులకు లోకస్థితి కోసం శత్రువధ విహిత ధర్మం కాబట్టి శత్రువధ మాకు చేయదగినదే అని ధర్మజుని ఆంతర్యం. (అర్జు)

వి॥సం॥ ధర్మేశ్వరః ధర్మఫలం ఇచ్చేవాడు. (నీల)

ధర్మస్య ప్రభురచ్యుతః అని భారతమే చెపుతోంది.

వి॥ బభ్రువు: ఇతడు పౌండ్రక వాసుదేవుని చిన్నతమ్ముడు.