దూత చెప్పాడు. ద్రుపదమహారాజు వివాహనిమిత్తంగా జ్ఞాతులకు విందుచేయటానికి భోజనం సిద్ధంచేశాడు. మీరు కూడా పనులు ముగించుకొని దయచేయండి. ద్రౌపదిని కూడా శాస్త్రోక్తంగా అక్కడే పొందవచ్చు. ఆలస్యం చేయవద్దు. (1)

ఈ రథాలు బంగారుకమలాల చిత్రాలు గలవి. శ్రేష్ఠాశ్వాలు పూన్చబడి, రాజశ్రేష్ఠుల కర్హాలై ఉన్నాయి. వీరందరూ కలసి వీటినధిరోహించి ఆద్రుపదుని రాజమందిరంలోనికి ప్రవేశించండి. (2)

వైశంపాయనుడు ఇలా అన్నాడు- జనమేజయమహారాజా! ఆకురు శ్రేష్ఠులు ద్రుపదపురోహితుని బయలుదేరతీసి విశాలమైన రథాలపైన అధిష్ఠించి రాజభవనానికి బయలుదేరారు. అప్పుడు కుంతి, ద్రౌపది ఒకే రథంలో కూర్చున్నారు. (3)

ద్రుపదుడు, ధర్మరాజు పురోహితునితో పల్కినమాటలను పురోహితుని ద్వారా విని కురుశ్రేష్ఠులను, వారి స్వభావం ద్వారా గ్రహించాలని అనేకవిధాలైన వస్తుసామగ్రిని తెప్పించాడు. (4)

రాజా! వివిధ ఫలాలు, సుందరంగా కూర్చిన మాలలు, కవచాలు, డాలులు, ఆసనాలు, గోవులు, త్రాళ్ళు, వ్యవసాయానికి ఉపయోగించే గింజలు, వివిధ కర్మల నిమిత్తమైన వస్తువులు సమకూర్చాడు. క్రీడల కొరకు ఉపయోగించే క్రీడాసామాగ్రిని పూర్తిగా తెప్పించి అక్కడ సిద్ధపరిచాడు. (5,6)

రెండవవైపున కవచాలు, మెరిసిపోయే డాళ్ళు, కత్తులు, పెద్ద పెద్ద విచిత్రరథాలు, గుఱ్ఱాలు, శ్రేష్ఠమైన విచిత్రాలైన బాణాలు, సువర్ణభూషితాలైన శక్త్యాయుధాలు, ఋష్టులు, ప్రాసాలు, పేల్చేసామగ్రులు, పరశ్వథాలు, యుద్ధసామగ్రి, ఉత్తమాసనాలు, పాన్పులు, చాలా రకాల వస్త్రాలు అన్నీ ఏర్పాటు చేశాడు. (7,8)

కుంతీదేవి సాధ్వియైన ద్రౌపదిని తీసికొని ద్రుపదుని అంతఃపురంలో ప్రవేశించింది. అక్కడి ఉదారమనస్కలైన స్త్రీలు కౌరవరాజపత్ని కుంతిని ఆదరసత్కారాలతో అర్చించారు. (9)

రాజా! సింహగమనం, ఋషభనేత్రాలు, నల్లలేడి చర్మాలు, బలిష్ఠమైన ఎగుబుజాలు, పాముపడగలవంటి బాహువులు గల ఆ పురుషోత్తములను చూచి ద్రుపదుడు, అతని మంత్రులు, పుత్రులు, స్నేహితులు, సేవకులు, అందరూ మిక్కిలి సంతసించారు. (10,11)

వీరులైన పాండవులు పాదపీఠాలతో కూడిన ఆసనాలపై సందేహింపక, మనస్సు నందు ఆశ్చర్యాన్ని పొందకుండా కూర్చున్నారు. (12)

సుందరవేషధారులై వంటయింటి పరిచారకులు, పరిచారికలు, బంగారుపాత్రలలో బహువిధాలైన భోజనసామగ్రిని తెచ్చి వడ్డించారు. (13)

రాజా! వీరశ్రేష్ఠులైన పాండవులు తమతమ ఆసక్తికనుగుణంగా భోజనపదార్థాలను తిని ప్రసన్నులై భోగసామగ్రిని కాదని, యుద్ధసామగ్రి కల ప్రదేశానికి చేరారు. (14)

మహారాజా! అది గుర్తించిన ద్రుపదుడు, ధృష్టద్యుమ్నుడు, మంత్రులు అందరు ప్రసన్నులయ్యారు. వారి వద్దకు చేరి కుంతీపుత్రులైన వారిని రాజకుమారులుగా భావించారు. (15)

ఇది శ్రీమహాభారతమున ఆదిపర్వమున వైవాహికపర్వమను

ఉపపర్వమున యుధిష్ఠిరాదిపరీక్ష అను నూట తొంబది మూడవ అధ్యాయము. (193)