మహాభారత కథా ప్రారంభము.

శౌనకుడు ఇలా చెపుతున్నాడు. ఉగ్రశ్రవా! భృగువంశం దగ్గర నుండి భారతాఖ్యానం నీవు చెప్పావు. నాకు చాలా సంతోషంగా ఉంది. (1)

సౌతీ! ఇంకా వ్యాసమహర్షి చెప్పిన కథలన్నీ యథాతథంగా వివరంగా నాకు చెప్పు. (2)

అనంతమయిన ఆ సర్పయాగంలో కర్మాంతరాల్లో సదస్యుల మధ్య జరిగినవి ఉన్నవి వున్నట్లు నీ ముఖం నుండి వినాలని కోరుతున్నాను. సౌతీ! వాటిని మాకు చెప్పు. (3,4)

సౌతి ఇలా చెప్పాడు. కర్మాంతరాల్లో వేదాశ్రితాలయిన కథలు చెప్పారు. అందులో వ్యాసుడు చెప్పిన చిత్రమయిన కథ భారతం చాలా గొప్పది. (5)

శౌనకుడు ఇలా అడిగాడు. జనమేజయుడు అడిగితే వ్యాసుడు మహాభారత కథను కర్మాంతరాల్లో వినిపింపజేశాడు. పాండవుల కీర్తిని ప్రకటించే ఆ పుణ్యకథను శాస్త్రోకంగా వినాలని కోరుతున్నాను. (6,7)

సజ్జనోత్తమా! నిర్మలాత్ముడయిన వ్యాసమహర్షి యొక్క మనస్సు అనే సముద్రం నుండి వెలువడినది ఈ కథ. సముద్రం వలెనే ఈ కథ కూడ రత్నాలకు నిలయం. ఈ కథను చెప్పు. (8)

సౌతి ఇలా అన్నాడు. అయ్యో! తప్పకుండా చెపుతాను. గొప్పదయిన ఈ మహాభారతం వ్యాస మహర్షికి చాలా ఇష్టం. ఆ మహాభారతం మొదటి నుండీ చెపుతాను. (9)

శౌనకా! మహాభారతం చెప్పటానికి నాకూ ఎంతో సంతోషంగా ఉంది. పూర్తిగా చెపుతాను. విను. (10)

ఇది శ్రీమహాభారతమున ఆదిపర్వమున అంశావతార పర్వమను ఉపపర్వమున కథానుబంధమను ఏబది తొమ్మిదవ అధ్యాయము. (59)