ఉగ్రశ్రవుడు ఇలా చెపుతున్నాడు. అమృతం ఉద్భవించిన తీరు అంతా నీకు చెప్పాను. ఆ అమృతం పుట్టిన సమయంలోనే ఉచ్చైఃశ్రవం అనే గుఱ్ఱం కూడా ఉద్భవించింది. ఒకనాడు కద్రూవినతలు ఆ అశ్వాన్ని చూశారు. అపుడు కద్రువ వినతతో "ఆ గుఱ్ఱం ఏ రంగులో ఉంది? త్వరగా చెప్పు" అంది. (1,2)

వినత అన్నది. ఆ గుఱ్ఱం తెల్లగానే ఉంది. నీవు ఏమి అనుకొంటున్నావు? నీవు గూడా దాని రంగు ఏదో చెప్పు. పందెం వేసుకొందాం" అంది. (3)

కద్రువ ఇలా అంది. "దాని తోక నల్లగా ఉందను కొంటున్నాను. నీకు చేతనయితే "దాస్యం" పందెం పెట్టుకో నాతో" అంది. (4)

ఉగ్రశ్రవుడు చెపుతున్నాడు. ఈ విధంగా ఇద్దరూ పందెం వేసుకొని, "ఈ విషయాన్ని రేపు వచ్చిచూద్దాం." అనుకొని ఇద్దరూ ఇళ్లకు వెళ్లిపోయారు. (5)

అపుడు కద్రువ వినతను మోసం చెయ్యాలని తన వేయిమంది సంతానాన్ని పిలిచి నల్లత్రాచులను ఆ ఉచ్చైః శ్రవం తోకకు వ్రేళ్లాడమని ఆజ్ఞాపించింది. "వెంటనే ఆ పని చేయండి. అపుడు నేను దాసీత్వం పొందనక్కరలేదు" అంది. వారు అంగీకరించలేదు. వెంటనే ఆ సర్పాలను కద్రువ "జనమేజయుడు చేసే సర్పయాగంలో మీరు భస్మం కండి" అని శపించింది. (6-8)

ఈ శాపాన్ని స్వయంగా బ్రహ్మదేవుడు విన్నాడు. ఇది దైవలిఖితం, కద్రువ అతి కఠోరమైన శాపం ఇచ్చింది కదా అనుకొన్నాడు. (9)

ఈ సర్పాలు విషపూరితాలు. ఇతరులకందరికీ బాధాకరాలు. అందుచే ప్రాణికోటికి మేలు జరగాలనే దృష్టితో దైవవశాత్తు కద్రువ తన పిల్లలకు శాపం ఇచ్చి మేలు చేసింది. కేవలం మానవులకే కాదు. దోషపరులైన ఇతర ప్రాణులకు కూడా ఇటువంటి ప్రాణాంతకమైన శిక్ష దైవమే విధిస్తుంది. బ్రహ్మదేవుడు కద్రువను అభినందించి కశ్యపుని పిలిచి ఇలా చెప్పాడు. "మహత్మా! నీ ద్వారా సర్పాలు ఉద్భవించాయి. పెద్ద పెద్ద పడగలతో వాటి శరీరమే కాకుండా వాటి విషం కూడా భయంకరంగా ఉంది. అందుచేత కద్రువ సర్పాలకు శాపం ఇవ్వటం జరిగింది. కాబట్టి మీరు ఆమెపై క్రోధాన్ని చూపకండి. యజ్ఞంలో సర్పనాశనం జరుగుతుంది. "ఈ విధంగా బ్రహ్మ కశ్యపుడికి చెప్పి ఆయనను శాంతపరచాడు. విషాన్ని హరించే విద్యను కూడా బ్రహ్మ కశ్యపునికి చెప్పాడు. (11-16)

కద్రువ ఇలా శపిస్తే ఆ శాపానికి భయపడి కర్కోటకుడు ఆ గుర్రం యొక్క తోకను తన నల్లని శరీరంతో మింగి వెస్తానన్నాడు - "మంచి"దని కొడుకుతో కద్రువ అంది.

ఇది శ్రీమహాభారతమున ఆదిపర్వమున ఆస్తీకపర్వమను ఉపపర్వమున సౌపర్ణోపాఖ్యానమను ఇరువదియవ అధ్యాయము. (20)

(దాక్షిణాత్య అధిక పాఠము 3 శ్లోకాళు కలుపుకొని మొత్తం 19 శ్లోకాలు)