ధృతరాష్ట్రుడిలా అన్నాడు. విదురా! శ్రీ కృష్ణుడు ఉపప్లవ్యం నుండి ఇక్కడకు బయలు దేరాడు. ఈ రోజు వృక్షస్థలంలో ఉన్నాడు. రేపు ఉదయం ఇక్కడకు రాగలడు. (1)

ఆ జనార్దనుడు ఆహుక వంశక్షత్రియులకు అధిపతి. యాదవులకు నాయకుడు. ఆయన గొప్పమనస్సు గలవాడు, పరాక్రమశాలి, సత్త్వ సంపన్నుడు. (2)

సమృద్ధమయిన వృష్ణిరాష్ట్రానికి మాధవుడు పాలకుడూ రక్షకుడూ కూడా, మూడు లోకాలకూ ఆ పూజ్యుడు ప్రపితామహుడు. (3)

ఆదిత్యులు వసువులు, రుద్రులూ బృహస్పతి బుద్ధిని ఆశ్రయించినట్లు వృష్ణి - అంధకవంశస్థులు ప్రసన్నచిత్తులై శ్రీకృష్ణుని బుద్ధిని ఆశ్రయిస్తారు. (4)

ధర్మజ్ఞా! విదురా! మహాత్ముడైన ఆ శ్రీకృష్ణుని పూజింపవలసి ఉన్నది. దాన్ని వినిపిస్తున్నాను, విను. (5)

ఒకే రంగూ, సుపుష్టమైన శరీరముగల బాహ్లికజాతికి చెందిన నాలుగు గొప్పగుఱ్ఱాలను పూన్చిన స్వర్ణరథాలను పదహారింటీని శ్రీకృష్ణునకు కానుక చేస్తున్నాను. (6)

కురునందనా! ఎప్పుడూ మదజలాన్ని స్రవిస్తూ, నిడుపైన దంతాలుగల ఎనిమిది ఏనుగులను కూడా శ్రీకృష్ణునకు కానుక చేస్తాను. ఆ ఏనుగులు శత్రువులపై దాడి చేయగలవి. ఒక్కొక్క దానికి ఎనిమిది మంది సేవకులుంటారు. (7)

బంగారువన్నెతో అందంగా శుభంగా కన్పించు దాసీలను వండమందిని ఆయనకిస్తాడు. వారంతా ఇంకా సంతానాన్ని పొందనివారు. వారితో పాటు వందమంది దాసులనుకూడా ఇస్తాను. (8)

గిరిజనులు నాకు కానుకచేసినవి, సుఖస్పర్శ గలవి అయిన పదునెనిమిది వేల కంబళ్ళను కూడా ఆయనకు బహూకరిస్తాను. (9)

చీనదేశంలో తయారయిన మృగచర్మాలు నాదగ్గరున్నాయి. వాటిలో కూడా శ్రీకృష్ణుడు కోరుకొన్నన్ని ఆయనకు కానుకచేస్తాను. (10)

ఇదిగో ఈ మణి తేజస్సంపన్నమై నిర్మలమైనది. పగలూ, రేయి కూడా ప్రకాశించేది. దీనిని కూడా శ్రీకృష్ణునకు బహూకరిస్తాను. ఆయన దానికి తగినవాడు. (11)

ఒకే రోజులో పదునాలుగు యోజనాల దూరాన్ని చేరగల కంచరగాడిదల రథం ఒకటుంది. దానిని కూడా నేను శ్రీకృష్ణునకు కానుకగా ఇస్తాను. (12)

శ్రీకృష్ణునకు ఎన్నివాహనాలున్నవో, ఎంతమంది పరిచారకులు గలరో వారికందరకూ/ఎప్పటికప్పుడు అవసరమైన భోజనం కన్న ఎనిమిది రెట్లు ఎక్కువ నేను సమకూర్చిపెడతాను. (13)

దుర్యోధనుడు తప్ప మిగిలిన నా అందరు కుమారులు, మనుమలు వస్త్రభూషణాదుల నలంకరించుకొని అందమైన రథాలతో శ్రీకృష్ణుని స్వాగతించగలరు. (14)

చక్కగా అలంకరించుకొనిన వారకాంతలు వేలకొలదిగ మంగళకరంగా మహానుబావుడైన శ్రీకృష్ణుని స్వాగతించటానికి నడచి ఎదురు వెడతారు. (15)

నగరంనుండి పరదాచాటు అవసరం లేని స్త్రీలు, కన్యలు, సుమంగళులునూ - శ్రీకృష్ణుని చూడ గోరినవారు ఆయనకు ఎదురేగుతారు. (16)

ప్రజలు సూర్యుని దర్శించిన విధంగా స్త్రీ పురుష బాలకులతో కూడిన ఈ సమస్తనగరమూ మహాత్ముడైన మధుసూదనుని దర్శించును గాక! (17)

"నగరంలోని అన్నిదిక్కులలో ధ్వజాలను, పతాకాలనూ అలంకరించాలి. రాచబాటపై నీరు చల్లి బాటలో దుమ్ము లేకుండా చూడాలి" అని ఆదేశించాడు దృతరాష్ట్రుడు. (18)

దుశ్శాసనుని ఇల్లు దుర్యోధనుని ఇంటికన్నా గొప్పది. కాబట్టి వెంటనే దానిని చక్కగా అలంకరించండి. (19)

ఈ భవనం అందమయిన ఆకృతి కల ప్రాసాదాలతో శోభిల్లుతోంది. శుభకరమై, అన్ని ఋతుశోభలతోనూ మనోహరమై మహాధనరాశితో విలసిల్లుతోంది. (20)

నా దగ్గర, దుర్యోధనుని దగ్గర ఉన్న రత్నాలన్నీ ఇక్కడే ఉన్నాయి. శ్రీకృష్ణుడు అడిగితే వాటిని సంకోచించకుండా ఇచ్చి వేయాలి. (21)

ఇది శ్రీమహాభారతమున ఉద్యోగపర్వమున భగవద్యానపర్వమను ఉపపర్వమున ధృతరాష్ట్ర వాక్యమను ఎనుబది ఆరవ అధ్యాయము. (86)